Author notes

Dööntjes vun Gundula III - De flegen Bessen - eerste Deel

PaulEberhardt

on April 29, 2010

Jou, düsse Dööntjes-Utgaav is wedder 'n beten langer worrn. Veer Sieten. Dat liecht nich toletzt dor an, wo groot de Datein warrn. Wenn dat to lang to'n laden bruukt, denn segg mi dat, denn mutt ick mi dor wat utklamüseern.

Just bitieden för de Walburgisnacht is't wat mit'n Bessen. Op düssen Weg ok leeve Grööt an mine Omma ;-) (Das's'n "Innseider"; mütt ji annern nich verstahn).

Vundag leernt ji noch 'nen neien Charakter kennen, un dat is Gundi ehr Urenkel, de arbeetslose Elektriker Krischan Lütjens. In mine Manuskripte fungiert he as ehr Assistent un Faktotum, so'n beten as Mr. Stringer bi Miss Marple oder Obélix bi Astérix, aber nich so dapperig. Un to'n enen oder annern Beer un Sluck seggt he ok nich nee. Ick heff em mol utfunnen, so dat Gundula enen Kompagnon hett, de wat vun Technik un so wieter versteiht - wo se keene Ahnung vun hett - un ehr dat in redige Wöör verklaren kann. So'n bodenständigen Jung de se torüch op de Eer bringen kann, wenn se överspöönsch ward. Düsse Verband is natürlich besünners interessant, wiel se binah glieks olt utsehn (Krischan is veeruntwintich), un dat is mi jümmers'n Höögen Dialoge för düsse twee to schrieven, besünners wenn se sik strieten as so'n ollen Ehepaar.

Vun alle Figuren de ick mi betto utdacht heff is Krischan woll de worrn, de mi sölbens an'n lieksten is. Wenn he jo gefallt, krüüzt he hier af un an mol wedder op.