Author notes

Döntjes V - De Föhrerschien (1 vun 3)

PaulEberhardt

on Sept. 30, 2010

Bi’n eersten Bild könnt ji sehn, dat ik mannichmal blots weet, wo ik mit’n Teken anfang, abers man nich wo ik wedder ophöör. Wenn ji dat to lütt is, heff ik’t hier in groot.

Us Gundi kann egens ganz goot föhrn - se maakt dat man blots na ehr ganz egen Maneer. De Idee, de ik egens harr, is dat’t bi Gundula, de egens allens kann, ok man wat gäven mutt, wat se nich kann, as to’n Bispeel mit’n Rekner ümgahn . Anners weer dat langwielich. Dorüm heff ik egens seggt, as ik se mi utdacht heff, dat se gor nich föhrn kann, oder tominnst, dat se as’n Schofför nich inne Wust doogt. Dat weer den aber’n Problem, wiel ik man sölbens nich wuss, worüm se dat denn nich könen schall - se is ja nu nich dösig un ok nich tappsch, is se nich. Butendem wull ik nich, dat de Lüüd dinkt, dat ik dink, dat Fruun nich föhrn könnt - ik kenn noog, de sogor bannig goot sünd. Denn heff ik düsse Idee hatt. Ik glööv, dor kann sik nu keen een mehr op’n Steert pett föhln, blots de, de al so keen Mannslüüd muchen, un dorüm ok düss Comic nich.

De Idee harr ik dör’n ollen Oppa in Twistringen hatt (glööv ik, kann ok Stuhr oder noch ganz wo anners ween), de jichenswann in’n Daagblatt weer:
Den hett namlich de Polizei stoppt, un as de sin Föhrerschien sehn wüllt, hett he jem een vun 1940 gäven, noch een vunne Wehrmacht! Na ‘ne Wiel is denn rutkamen, dat he ok’n modeernen Föhrerschien hatt harr, aber denn harr he’n paar Maand vördem afgäven, denn he wull man egens nich mehr föhrn, wiel he al so olt weer. Nu aber, sä he, is tokamen Week sin negentigsten Geborsdag, un he wuss nich, wo he anners de Inladens bitieden to sine Fründe kregen schull. Un ahn Föhrerschien much he ja nu ok nich föhrn, aber düssen harr he noch in sin Schapp funnen.
Wenn ik dat noch so weet, hefft se em denn ok nich verknackt, sünnern blots rumkregen, dat he sin Auto stahn lett un se föhrt em denn ok na Hus.

Ik bün bannig stolt, wo ik Gundula ehrn Föhrerschien henkregen heff. Ik heff dor ja jümmers noch keen ornlichen Programm för. Ik harr bito 'ne Kopie vun’n echten as Vörlaag.