Author notes

Dor bün ik wedder - un kiekt mal, wat ik allens mitbracht hebb :)

PaulEberhardt

on July 12, 2014

Moin Lüe!
Nu bün ik woller dor, düt mal ok wohraftig!
Deit mi bannig leed, dat ik so lang wech weer. Vör'n paar Manden duch ik jümmers noch, dat dat nich mehr lang duert, bet ik woller neie Comicsieten in't Nett stellen kann, aber, as dat so is, keem dor jümmers wat tweschen. Ik will dor ok gor nich veel över snacken, blots dat bi mi man allens so'n beten dörenanner gahn is. Nu hebb ik aber woll allens woller in'n Gripp. Dorto muss ik aber erst mal för'n paar Manden nach England utwannern, nach Gloucester (man seggt aber Gloster), wenn ji't nipp un nau weten wüllt. To'n Eenen is dat man goot, denn ik mutt mit mien Utbillen as'n Engelschlehrer wieterkamen, to'n Annern heet dat aber, dat ik nich all mien Tekentüüg in'n Fleger mitkregen kunn, un ik kööp mi de Farven hier ok nich all nei - so lang bliff ik hier nu ok woller nich. Ok so hebb ik aber noch'n paar bunte Billers fardig kregen, un de hebbt nu vun mi den letzten Sleep an'n Rekner kregen. Is man'n Anfang. Un'n neie Comicsiet hebb ik ok al tekent, un dat gifft ok noch welke nach. Ik kann jo seggen, ik frei mi, dat ik dat woller maken kann. Dat weer, as wenn'n Stück vun mi jichenswo verschütt gahn weer.
Ik fang mit düsse neien Biller hier an Gundi ehr Stuvenwand an, op de all noch mal vörstellt warden. So markt denn de Söökmaschienen un so wieter ok, dat hier woller wat passeert.
Dat is een vun de Saken, de ik al lang mal maken wull. Gundula un de Stuventiger gifft dat al siet binah fief Johr un hett al mehr as 200 Sieten (un de sünd faken dree oder veer Sieten lang!), un denn glööv ik mal, muss ik dor doch wat för de maken, de just erst dorto funnen hebbt. Anners finnt sik man keeneen mehr torecht, sünnerlich wenn he villicht noch nich so veel op Platt leest hett.
Ik glööv aber ok, dat dat ok för de, de düt Comic al bannig goot kennt, ganz hööglich warden kann. In düsse Vörstellen kann'n man noch'n beten wat vun düsse Minschen un Beester rutkregen, dat in'n Comic noch nich so klaar weer - just wiel't bet vundag noch nich in de Vertellen rinpasst hett. Mi schall ok verlangen, wat ji dor vun dinkt. Of ik se goot vörstellt hebb un so. Wenn'n dat sölbens maakt kann'n woll licht mal "Betriebsblind" warden.
Dank ok an all de, de woller rinkieken. Un an de, de to'n ersten Mal hier rinkieken un dat goot finnt. Mi hett dat hier echt fehlt!