Author notes

Super-Sondersiet: Op'n Marktplatz

PaulEberhardt

on July 22, 2014

So! Un hier is nu, wat so lang duert hett. Nötig doon hett't aber!
Ik glööv ik hebb man een un'n halven Maand an düsse Teken setten. Dat is aber ok, wiel ik so veel üm de Ohrn harr, dat ik nienich dorto keem mal'n paar Stunnen to'n konzentreerten Arbeiten to hebben. Ik bün dor ok binah an vertwiefelt, denn düsse Rennesanz-Fassad weer bald rein to doll. Aber dat muss ik nu teken. Harr ik dat denn nich maakt, denn nienich, un denn harr ik ok mit den Rest vun'n Comic nich wietermaken wullt.
Ik meen, ik kann doch nich fief Johr un tweehunnert Sieten lang 'n Comic maken, dat in Bremen speelt, un dor is denn nich tominnst eenmal dat Rathus un de Roland mit de spitzen Knee in! Kann doch nich angahn, kann dat nich!
Wat noch nich so licht weer, weer dat Ding as een Bild tohoop to klütern. Dat Ding is so groot, wegen all de Details, dat dat nich op een Blatt passt hett, also hebb ik dat op mehr tekent un anmalt. Un glöövt man nich, dat dat denn so licht geit, as't achterna lett! Aber dorför hebb ik nu ok 'n feinen Poster för mien Wand. Ik kann just noch keen verköpen, aber wenn dat jichenswann geit, segg ik jo Bescheid.
Hier op mien engelschen DeviantArt Siet is dat nochmal in gröter, dat'n de Details ok better sehn kann: http://fav.me/d7rs3xz
De Gluckhenn is ok dor noch to lütt, ok op den Orginal, so dat de blots as'n Farvfleck lett, aber sogor de is dor op! As Madda un Kede säen is dat ja dat een Relief, op dat dat ankaamt - de Rest, de bleeksteerten Frun un Seemonster un so, dat ischa allens blots Dekoratschoon…
Op Engelsch hebb ik noch mehr verklaart, wiel de ja tomeist nich mal gau rankamen un sölbens kieken könnt. Ik maak dat hier nu nich, aber wenn ji mal wat weten wüllt, denn bruukt ji blots fragen. As ik dat Bild maakt hebb, hebb ik dat Rathus un wat noch op den Bild is so nipp un nau studeert un mi so veel dor över anleest, ik weet nu Bescheid.
Ik mutt aber noch wat to de Lüe op den Marktplatz seggen. Klaar sünd dor Gundi, Tiger, Zoffie un Krischan. Aber ik hebb ok för'n paar Fründe vun mi, de sölbens Internetcomics maakt, un mien Comic jümmers leest, wat maakt. Ik wull jem schönen Dank seggen, un dorüm heb ik'n paar Figuren ut den ehr Comics ok noch op den Marktplatz packt. Wenn ji ok engelsche Comics lesen möögt, denn könnt ji dor ok mal rinkieken. Wokeen dat allens is un de Links sünd in'n Kommentar to de engelsche Verschoon.
Dat is ok wegen düsse Cameos, dat ik nich so gern Posters vun düssen Bild verhökern will. Ik will nich mit anner Lüe ehr Figuren Geld verdenen, dat höört sik man nich! Blots wenn de all seggt, dat de dor keen Problem mit hebbt, denn dink ik dor nochmal över nach. Oder ik maak jichenswann noch'n Verschoon, op de blots mien egen Figuren op sünd.
Wat ik noch seggen kann: een vun düsse Cameos, as dat heet, is Johannes Brahms, un vun den weet ik, dat he mal Gast in'n Ratskeller weer. Dorüm kickt he ganz verdattert, wieldat he de Börgerschap süht. De is ok mi man'n beten to modern! Wi kiekt ja bi de Börgerschap ut de Dör, dorüm muss ik de nich teken, un dor bün ik ok ganz froh över. Is doch wahr: steiht dor so'n ol' Glaskist just neben den Unesco Weltarven! ;)
Wat ik noch seggen wull, dat kann angahn, dat dat Bild bald nich mehr henkaamt - de wüllt woll dat Dack vun'n Rathus nei maken, un denn is dat otwaars woller dicht, aber gor nich mehr gröön. Also mal aftöven un Tee drinken. Mal kieken, of un wat ik dor noch vun maak.
Na ja! Ik haap man, dat ji dat Bild lieden möögt. Kiekt mal woller rin! :)