Author notes

Sössdagerennen

PaulEberhardt

on Jan. 13, 2017

Tokamen Siet an'n Freedag, 27. Januar
Moin, tosamen, dor bün ik mal wedder!
As ji woll weet, is vundag, dat heet vun gistern bet tokamen Dingsdag, dat Sössdagerennen - oder Sixdays, as dat nu Mood is to seggen, un wieldat ik man bannig lang keen Bremensie mehr tekent hebb, hebb ik mi dor mal 'n beten wat mit bemengeleert.
Vun de Sieten, de ik al fardig hebb, is dat de leste, un wat mit Wiehnachten un för'n paar Maand na England flütten, hebb ik dat nu nich mehr bunt maken könnt. Dat weer villicht noch better ween, aber so geit't denn woll ok. Better as nich rechttiedig to Midde Januar.
Vun Fahrradbahnrennen weet ik man nich alltoveel, un egens geit mi dat ok'n beten af, aber just dorüm weer dat ok mal een schön vigeliensche Opgaav, dor wat vun to teken. Ik möss dor bannig veel för lesen, un ik glööv ok jümmers, dat dat man ok gor nix is, wenn'n dat nich sölbens maakt, oder jichenseen kennt, de dat maakt. För us anner Lüe is dat blots so'n paar Keerls, de jümmerto in'n Kring rümföhren doot, un dat weer't denn ok al. Ik glööv, dorüm is bi de Sixdays ok jümmers so veel Programm mit dorbi, wat so rein gor nix mit Fahrradföhrn to doon hett, man anners woll ganz hööglich is.
Na, schaad ok nix! Un ik will ok wohraftig keeneen op den Steert petten, de dor mehr an finnt as ik, un dat deit mi ok Leed, wenn ik dor nu jichenswat verkehrt dorstellt hebb, un ik haap, dat sik de Fäns vun'n Sössdagerennen över dat Comic ok so'n beten amüseern könnt.
Na denn, kiekt mal woller rin!