Author notes

Spöken un Spijöken

PaulEberhardt

on May 31, 2017

[p]Moin Lüe! Düt mal geev dat veel to’n Lesen, man wat mutt, dat mutt. De Geschicht schall wietergahn, un an düsse Stell gung dat man nich mehr, ahn all dat to verklaren, wat hier verklart ward. Just as Zoffie, hebbt wi so woll ‘n Inblick hatt, dat Wickersch gor keen so lichten Beroop is; dat dat bi Gundula blots jümmers so licht lett, wieldat se’n Vullprofi is, de dat al siet’n paar hunnert Johr maakt. Lehren mutt se ok noch’n beten wat, un dat is, dat wenn’n Katt di ehrn Mors in dien Antlaat höllt, denn will se di seggen, dat se di afsluuts vertroot. Se wiest di, dat du to ehr Familje tohöörst. Un wat maakt Zoffie? Se krakeelt, as wenn se den Liefhaftigen sehn harr![/p]

[p]So’n Siet tohoop klütern is ok nich so licht as’t lett. Düt mal wull dor nix so passen, as ik mi dat woll utdacht hebb, un denn bruuk ik ’n beten, dat ik dat topass maak. Mit sowat bün’k an’n Enn nienich so ganz tofräden, aber hölpt ja allens nix.[/p]

[p]Ik haap sünnerlich, dat ik nu nich noch ut Versehn mehr verklart hebb, as ik wull. Weet ji, ik kann dat ja gor nich af, wenn so’n Fäntäsy-Autor to veel dor vun vertellt, na wat för Regeln de Töveree bi em in sien Welt nipp un nau funkschoneeren deit. Dor geit denn blots dat magische vun af, wenn ji weet, wat ik meen. Dat will ik man blots nich. Wo dat mit Zoffie ehr Utbillen as’n Wickersch nu wieter geit, dor mutt ik denn aber doch’n beten wat opklaren, tominnst so wiet, dat ji as Leser noch mitkriggt, wat dat nu wedder för’n Tüünkraam is, wat de dor maakt. Denn dat is so:[/p]

[p]1. De leste Siet över’t Spökenkieken geev dat Anfang 2013. Dat sünd nu veer ganze Johr! Mit’n Wietermaken hebb ik woll keen Problem – ik hebb ja mien Notizen – man för elkeen anners as mi is dat doch veel to lang, as dat sik dor noch een op besinnen kann, wat dor weer un wo dat weer.[/p]

[p]2. Spökenkieken, as’n Wickersch dat deit, is’n beten speziell un ok nich so ganz lichte Kost. Man dat mutt so, dat schall ja ok allens ganz akkrat ween. Ik hebb mi dortomalen mien egen Riem op maakt, wat in de olen Legenden steiht un in de Literatur över olen noordeuropäischen Höhnerglööv. Vun just dat, wat Gundi Zoffie hier bi bringt, gifft dat wohraftig ganz veel Vertellen in de oldnoordsche Folkore. Düsse Töver-Technik (oder tominnst wat, wat woll just so lett) heet Seiðr, un so’n Fru, de dat kann, hett se Seiðrkona, Spákona (oder op Angelsassisch spæwīfe) nömmt, un dat heet „een vun dat Spökenkieken Kunnige“. Klaar, dat’t ok bannig veel anner Namen geev (as Völva or Vala), un ok Mannslüe, de dat ok maakt hebben (Seiðrmaðr), aber dat könnt ji mal schön sölbens allens nalesen, wen ji dat denn wohraftig so nipp un nau weten wüllt. Dat dor’n Ünnerscheed to’n Schamanen is, hebb ik mi aber reinweg utdacht. Wat düsse heidenschen Schamanen anners noch so drieven hebbt, dat passt so rein gor nich to use Deerns, un ik will ok nich, dat so’n Heiopei dat noch in’n Kopp kriggt un namaken will. Ünner’n Streek heet dat allens man blots dat: so’n Siet as düsse harr ik op jeden Fall maakt. Ok veer Johr tovör weer dor keen Weg an vörbi gahn.[/p]

[p]3. Zoffie schall mit ehrn Utbillen mal vöran kamen. Ik hebb al’n ganzen Bult vun Geschichten praat, man ik will nich dat dor noch sowat as de Spökenkieker-Geschicht tweschen kaamt, blots wieldat de noch nich fardig is. Dorüm geit dat in de tokamen Sieten üm’t Spökenkieken, un wat dor denn nu vun ward. Tiger hett dorbi’n wichtige Rull, also kriggt ji so un so ganz veel vun em to sehn. Achterna geit dat Comic woller so wieter, as ji dat vun mi kennt. Ik mach ja geern mal wat utprobeern, aber allens över’n Kopp smieten is dösig. Sowat do ik nich, dor hebbt mal keen Bang![/p]

[p]Ik hebb ok düt mal een or twee Hommaaschen an Künstler de ik mach rindoon. Ik bün al ganz gespannt, of ji de all finnen könnt. Vun een vertell ik ji man glieks, un dat is dat Bild Magic Circle („de magische Krink“) vun den engelschen Maler John William Waterhouse. Ik weet nich, of ji dat kennt, man för mi is dat dat beste ole Bild vun’n Wickersch, dat’t gifft. Een kann woll seggen, dat Waterhouse sik utdacht hett, wo wie vundag dinkt, wo’n Wickersch laten mutt. Ik harr dat woll ok geern mit Gundi as Hauptperson malt, aber mit de Tied finn ik, dat dat mit Zoffie binah noch beter is. All dat Gedöns mit de Symbole un so passt to ehr beter. Gundi hett gor keen Sinn nich för so veel Weewark.[/p]

[p]Dat Bild kannst ok anklicken. Op de Siet vun de Kunstgallerie is dat gröter.[/p]

[p]Na denn, maakt’t man goot bet tokamen Mal. Kiekt mal wedder rin![/p]